احداث اسبوع الدوري الاسباني والانجليزي في يوم

img

نقدم لكم ابرز احداث الاسبوع في الدوري الاسباني والانجليزي في هذا المقال :

*بعد نهاية لعبة ريال مدريد، الفريق خسر للمرة الثانية، بس هالمرة على أرضه، الجماهير خايفة من انه تكون هالخسارة بداية لسلسلة تعثرات، بس برأيي صعب، الريال عنده DNA العظمة، بفوز واحد قادر على تخطي هيك شي .
وخسارة اليوم هي مو اكثر من خسارة لمباراة كأس وبالاياب قادر برياحة عالعودة ..

*جمهور اليوفي وريال مدريد هالاسبوع شربوا من نفس الكاس، سيناريو كربوني بين الفريقين، الفريقين اللعبة بررا أرضن مع فرق عنيدة بالدوري وبأصعب الملاعب، الفريقين خسروا بنتيحة 2-1، والفريقين كانوا عم يلعبوا بال3-5-2، وحتى المباراتين كانت بنفس الوقت ! مفارقة عنجد غريبة !

*بعتقد جماهير الريال ما تقبلت انه تشوف فريقها عم يلعب على اصطياد هدف والتكتكل بعدها، هلق صح زيدان كان قاب قوسين من الفوز بس هذا ما بيشفعله انه يلعب بهيك خطة لانه مقدرات فريقه غير مناسبة لهيك تكتيك واستطاعت اللاعبين Over عالخطة.
*بس بيقدر ريال مدريد يستفيد منها ويعتبرها خطة طوارئ، او خطة لتسكير اللعبة ممكن باخر نصف ساعة.
كونتي واليجري شاطرين فيها كتير هي الحركة، الحكي كبير عن ال3-5-2 حنحكي فيه بمقال لحاله اذا الله راد.

*الفرق نقطة وحدة بس بين اليوفي وروما، والريال واشبيلية مع افضلية الريال انه معه مباراة مؤجلة.
نقطة ايجابية كتير لليوفي بالمباراة هية ماركو بياكا، اللاعب اظهر لمسات رائعة بالنص ساعة يلي نزلها، وصار لازم انه اليجري يخلينا نشوفه اكتر من هيك.
ونيكولا كالينيتش واحد من افضل مهاجمين الموسم كمان حنحكي عنه بتقرير مفصل عن مهاجمين الكالتشيو بمرحلة الذهاب.

*كترتيب لهدافين أوروبا لحد الان منلاحظ انه هدافين الاسباني هذا الموسم على غير العادة طبيعيين بالنسبة لغير دوريات، بدايةً بالفرنسي كافاني ب 18 وبعده لاكازيت ب14، بالبوندزليغا اوباميانغ ب16 ، بالكالتشيو ايكاردي يلي عم يعيش صحوة مخيفة ب15 والحصان الاسود بيلوتي ب14، بانجلترا سانشيز وكوستا وزلاتان معن 14 غول، وبالنهاية الاسباني ميسي وسواريز ب14 ورونالدو ب12 .

*غوارديولا بلش يدخل بالنفق المظلم بعد خسارته 4-0 من ايفرتون، بالرغم من استحواذ وصل ببعض الاوقات بالمباراة ل71 بس دفاع بده تكسير رجلين تبع السيتي.

*ارسنال وفوز منطقي 4-0 ع سوانزي يلي بالمركز الاخير، اهم ما في المباراة هو عودة داني ويلبيك، هي اول عشر دقايق بشارك فيها هذا المرسم بعد العودة من الاصابة .

*بفرنسا تعادل سلبي غير مقبول من نيس مع فريق المرتبة الاخيرة ميتز كلفه يصير بالمركز الثاني ب45 نقطة بالتعادل مع موناكو يلي فاز بكلاسيكو فرنسا 4-1 ع مارسيليا .
وباريس سان جيرمان وراهن ب42 نقطة يلي تاني مرة بفوز بفضل هدف دراكسلر.
حزروا شو الفلم مع موناكو، موناكو اقوى هجوم ب60 هدف وبعدن الPSG ب 39 !! وهداف الفريق فالكاو ب 12 غول .

*برشلونة بلش يصالح جماهيره ب5-0ع لاس بالماس بمباراة شهدت لحظة تاريخية بعودة اليكس فيدال للتشكيل الاساسي، روما بدون محمد صلاح وفوز بشق الانفس ع اودينيزي باوديني 1-0 ، نصيحة لا حدا يروح ع حاله تضييع ضربة الجزاء الرهيبة لإيدن دجيكو .

*لقاء كبيري انجلترا انتهى بمصالحة وطنية ب1-1، حاطين حطاطه لبول بوغبا بعد تسببه بركلة الجزاء، مورينهو بلش يرجع يفرض اسلوبه بالدوري، وكلوب تنفس الصعداء اخيراً بعودة فيليب كوتينهو.

*تشيلسي بدون دييغو كوستا فاز ع ليستر 3-0 بالكينغ باور وتألق رهيب لظهير الفيولا السابق ماركوس ألونسو، غياب محرز وسليماني مشان أمم افريقيا حيضرب رانيري اكتر مانه مضروب هالموسم.

*منرجع لايطاليا بالمباراة يلي التعبت يوم الاثنين بين التورو والميلان انتهت 2-2 بعد كام باك رائع للميلان يلي كان حيجيب المباراة لولا رعونة سوسو اخر ثواني المباراة، ثلاثي هجوم التورو فالكي، ليايتش وبيلوتي رهيبين وبالاخص بيلوتي، مهاجم من زمن المهاجمين الكلاسيكيين لايطاليا. باسيليتش ولوكاتيلي مع الميلان ومستوى رهيب للثنائي بالوسط.

*بالدوري البرتغالي بورتو بالمركز الثاني ورا بنفيكا ب4 نقط، الفكرة مو هون، الفكرة انه كاسياس هذا الموسم عامل 11 كليت بآخر 13 مباراة، وهلق خلصنا الجولة 17 وإيكر لحد الآن مسجل ضده 7 اهداف بس، رقم مخيف عنجد للقديس ..

*مع نابولي قلب الدفاع لورينزو تونيلي وثاني هدف بثاني مشاركة ضد بيسكارا فريق البيرتو جيلاردينو يلي انتهت 3-1.

عالسريع ايمتا ؟

*الجمعة عجلة الدوري الالماني حترجع تشتغل من جديد عال9:30 بين البايرن وفرايبورغ .

*السبت في قمة بين نابولي والميلان عال09:45 بالسان سيرو، وحتى تكمل مع غوارديولا في السيتي مع توتنهام بملعب الاتحاد عال7:30 وريال مدريد عال5:15 مع ملقة.

*الاحد حيكون فيه اليوفي مع لاتسيو بالتوقيت المبكر عال1:30 وعال6:30 في تشيلسي وهال سيتي وعال09:45 برشلونة مع ايبار .

رحل بيرلو، ورحل تشافي هيرنانديز وهلق صار دور تشافي الونسو، اعتزال هيك نوعية من اللاعبين خسارة لمتعة كرة القدم للأسف ..

هذا كان كل شي لهالاسبوع، منشوفكم الاسبوع القادم

الكاتب Mohammed Ali FaYez

Mohammed Ali FaYez

كاتب صحفي.

مواضيع متعلقة

اترك رداً