اخبار الدوري الانجليزي والاسباني والايطالي هذا الاسبوع

الدوري الانجليزي , الدوري الايطالي , الدوري الاسباني , البريمرليج , لاليغا , كليتشو , اسبانيا , ايطاليا , انجلترا ,الدوري الاسباني والانجليزي
15

اخبار وتحليلات الدوري الانجليزي والاسباني والايطالي هذا الاسبوع :

*خليني ابدا بالمباراة اللي برأيي كانت احلى مباراة في الجولة , اذا ما كانت من احلى مباريات الموسم كلله، نابولي ميلان بالسان سيرو مباراة خلتنا نرجع لورا كتير ونتذكر ايام الزمن الذهبي للكالتشيو، واكيد ما بقصد بكلامي انه الكالتشيو حالياً مو ذهبي او غير جميل، لا بالعكس بلي بحب الكالتشيو بحب كل الوانه وازمانه وموديلاته – في الدوري الايطالي .

*منرجع للمباراة يلي بدنا نحكي شوي عن مونتيلا وفريقه، للامانة هذا الشخص غير من هوية الفريق كلياً لفريق عنده شخصية، الفريق بس لسه ينقصه الخبرة، مو منطقية الدقايق الاولى دائماً ياكلوا فيها غوال وكأنه الفريق بتبلش اللعبة عنده عالدقيقة 15 !! ، فكرة الرفعات الطولية البعيدة فكرة حلوة للميلان شفنا الميلان عم يطبقها كتير، وشغلة تانية شفنا الميلان الخطورة عم تكون من كل اللاعبين من ثلاثي المقدمة وحتى شفنا الوسط من باسيليتش و كوتشكا والرائع دائماً بونافينتورا وحتى وصلت انه نشوف خطورة من دوناروما متل ما كان حيسجل اخر اللعبة.
بس سؤال لمونتيلا، شو الفكرة من تنزيل كالابريا عوضاً عن انتونيلي ؟!
ضعف الميلان هو اظهرته، الاظهرة ضعيفة بالمقارنة مع باقي الخطوط، وطبعاً بالاضافة الى انه دكة البدلاء عادية جداً مع استبعاد لابادولا، على امل انه ديليفيو ما يخيب الظن.
بالنسبة لنابولي الشغل يلي عامله ساري بده عشر مقالات لحاله، بتوقع نتاج هذا العمل لازم يبين قدام ريال مدريد حتى نقول انه عنجد هذا الزلمة عمل شي .

*ليفربول هجوم نار ودفاع بسكوتة، مو منطقي تضييع النقط، صحيح فيرمينهو اشتغل وجاب غولين بس تأثير يورينتي كان اقوى.
10 نقط عن تشيلسي كتار، كتار كتير .

*اشبيلية لساته صامد بالمركز الثاني، سيناريو هيتشكوكي شهدته اللعبة مع صاحب المركز الاخير، حالة تحكيمية رهيبة بالمباراة انه يصفر الحكم انه تسلسل ع اوساسونا وحكم الراية ماله رافع شي، هجمة كانت ممكن تغير من شكل المباراة.
بالمناسبة يوفيتيتش لعب مباراة كاملة و الفرق صار نقطة مع الريال بأفضلية الريال مع مباراة مؤجلة.

*واين روني صار الهداف التاريخي للمانيو بعد ما انقذ فريقه بالتعادل بهدف من ضربة حارقة خارقة، السيتي وتوتنهام ومباراة كتير حلوة كان بطلها الحارس الفرنسي هوغو لوريس بخطئين غريبين ماله بالعادة، وليروي سانيه كان بطل الفريق من ناحية السيتي، و10 دقايق كانت بتكفي حتى نشوف البرازيلي الجديد ، ومنجي لأكثر المستفيدين هالجولة كونتي يلي استفاد من اخطاء الباقيين وقدر يربح ع هال سيتي بفضل مهاجمه دييغو كوستا يلي حل مشاكله وقاده لفوز رقم 18 من 22 جولة .

*بفرنسا كافاني قاد الPSG لفوز بهدفين حلوين واحد منهم ضربة حرة، الفرق صار 3 نقاط عن موناكو يلي فاز ع لوريان وصار بالمركز الاول بسبب نيس يلي بتعادله ضيع الصدارة بفرق نقطة.
نيس باخر 4 مباريات تعادل 3 وخسر 1 ، بلش يترنح الفريق ويرجع لمركزه الطبيعي بعد فورته، وفالكاو وبالوتيلي ما سجلوا شي هي الجولة .

*كلاسيكو فرنسا بين ليون ومرسيليا فاز ليون 3-1 ، سجل ثاني هدافين الدوي لاكازيت هدفين وفالوبينا هدف، بمباراة شهدت مشاركة الوافد الجديد ممفيس ديباي ل10 دقائق .

*اليوفي فاز ع لاتسيو 2-0، اليوفي لعب بخطة ال4-2-3-1 ، اول مرة اليجري بيلعب بهيك تشكيلة، و مانزوكيتش متل العادة حرت الملعب حراتة، روما والانتر فازوا عالهادي هدف بهدف ..

*وقت فريقك يفوز بهدفين عن طريق قلب الدفاع فمعناها فريقك في مشكلة اهمها غياب الاظهرة، الريال عم يمر بمرحلة تخبط واصابات بالجملة اهمها مارسيلو و مودريتش، هي ايام الاختبارات الحقيقة لزيدان لنشوف كيف حيتعامل مع هالغيابات، وخليه عم يعفنه لموراتا عالدكة.

*اهداف كتير بالدقيقة الاخيرة هالجولة،
غريزمان انقذ اتليتيكو مدريد من الخسارة بهدف مخيف اخر دقيقة باللعبة، متل فوز الارسنال الماراثوني بالدقيقة 90+8 ضربة جزاء لأليكسيس، فوز كسر من روتين الارسنال وعمل من فريق ارسن فينغر تاني الترتيب، وليفا انقذ البايرن من تعادل قدام فرايبورغ كمان باخر دقيقة بالمباراة، وبرشلونة بكل هدوء فاز 4-0 ع ايبار، اصابة لبوسكيتس حتزعج برشلونة كتير.
واللايبتزيغ لساته عم يكمل حلمه بفوز ع فرانكفورت 3-0، والليستر اللعبة الجاية اذا خسر قدام بيرنلي حيدخل بصراع الهروب من الهبوط للاسف.

*الانجليزي الاسبوع القادم ما في دوري في شوية مباريات كأس مشكلة .

بكرا الاربعاء في كأس ايطاليا اليوفي مع الميلان عال10 باليوفي أرينا وفي الريال مع سيلتا فيغو الاياب عال10:15 ، وفي كأس انكلترا سوثهامبتون مع الليفر كمان عال10 بالأنفيلد .

والخميس في المانيو مع هال سيتي كأس عال09:45، وفي عال10:15 سوسيداد مع برشلونة بالكامب نو .

السبت عال4:30 في البايرن مع فيردر بريمن، وبالليل في عال09:45 الانتر مع بيسكارا.

الاحدفي برشلونة بالتوقيت المبكر عال1 مع بيتيس، الريال بلعبة صعبة مع سوسيداد عأرض الريال عال09:45 وللاسف بنفس الوقت حيكون في كلاسيكو فرنسا عال10 بين موناكو والPSG ..

بالنهاية الحمد لله ريان ماسون قالوا تحسن بعد اصابته ضد كاهيل، ولا تنسوا تشوفوا غول روني لانه بيستاهل يكون عليه الهداف التاريخي، وغول ديبالا كمان بينحكى بأمره .

#الدوري

المزيد من الاخبار المزيد من الموضوعات للكاتب

رد علي التعليق

لن يتم نشر ايميلك